Zarkawt Presbyterian Kohhran in mamit District tanpui dawn.

Zarkawt Presbyterian Kohhran chuan Mamit District tam zia hria in; Dt.1.5.2008 dar 11:00am hian a mamawh apiangte tanpuina turin Rs.1,20,000/- chu District Buhzem ah an rawn chhung dawn a, he hun hi DC Bungalow an neih a ni dawn a ni.

Khawthlang Lelte ah Rulpuihlim Nula, Rebecca Zothanpari.

Mizo Zaimi Insuihkhawm Pawl (MZI) Headquarters Mamit in a an huaihawt ' Khawthlang Lelte' 2008 chu tluang taka zawhfel a ni ta. Dt.26.4.2008 zan a mamit Chhimveng hall a Result puanna neih ah hian AIR Aizawl Station Director, Pu Lalthansanga Varte chu khuallian a ni a, MZI Gen. Hqrs. hruaitu engemaw zat in he hun hi an rawn hmanpui bawk a ni.

Khawthlang Lelte, 2008 a tan chuan Rulpuihlim Nula; Rebecca Zothanpari chu thlan a ni a, a ni hi AIR Aizawl Station chuan an Artist a tan an la nghal bawk a, tin Pawisa fai Rs.10,000/- + Trophy + Certificate + Scooty a dawng a ni.

Top 5 a tling te chu Lelte Editor Pu C.Dinthanga chuan Lelte chanchinbu kumin chhung a tan a free dawn bawk a ni.

Mamit District ah Aieng lei mek zel a ni.

Kan hriat theuh ang in; Mizoram Sorkar chuan Mautam Tam do nan Aieng chi an sem vak a nih kha. Tunlai hian Mamit District chhung khaw hrang hrang ah Aieng hi Sorkar in a lei mek a, Kg ah Rs.6.00 in an leisak mek a ni.

Pix. mart ( Lengte & Lengpui Aieng chu)
Khaw hrang hrang ah lei theih zat tur bithlih a ni a; a maherawh chu Aieng hi a ching an tam a vangin, lei tur zat pawh hi tihdanglam a ni a, a awm ang ang lei tura hmalak a ni.

He Aieng Sorkar in a lei dan tur ah hian information an hriat a tanga ni 2 ni ah emaw te a buk tur an kal a, ni hnih chhung ten lei na hun an siam sak a, heihi a chingtu lam tan a buaithlak hle ni a hriat a ni. Achhan chu tuman an la dawn tih an hriatchian loh chuan Aieng hi an cho ngam lo a, an hriat hian chawhzawh na hman a ni bawk si lova, an buai hle ni in thu kan dawng.

'AWK E' la hmu ve lo tan...

Ka Quarter ah 'AWK E' a rawn lut hlauh mai a, hei la hmu ngailo tamtak in awm ka ring a chuvang in ka rawn dah a ni e. AWK E' hi Laiking ai chuan a lian zawk fe a; a hming ang hian 'awk e' tiin ring takin a hram thin a ni. Hei poh hi ka umchhuak na chu; zan ah chuan ring fe in a rawn hram leh ta tho va!! ka harh chiang hle.

Mamit District Buhzem ah chhunglut zel.

Rawpuichhip VCP te chhung chuan Mamit DC Pu Lalengmawia hnen ah District tam Tanpuina a tan Rs.1000/- a hlan.

Rawpuichhip YMA Diamond Jubilli a hmanpui na ah DC chuan Mamit District chhung khaw kilkhawr ber ber te a fanchhuah vek tawh thu leh, Mihring dinhmun in thlauhzia te; a biktakin, kan Bru Unau te leh Chakma te harsat zia sawi langin, tumah 'intam siak' lo turin a chah a, Mizo te chu intanpui tel tel thin kan nih ang in, tanpui ngai leh chhuanchham em em an awm ve loh thu a sawi a. He mautam Tram chhung hian Mamit District chhung ah tumah Riltam a vangin an thi tur a ni lo' tih sawi nawn leh in, Theih tawp chhuah a he Tam hi do tlang turin mipui te a chah bawk a ni.

Ngaithla tu te zing a tangin Pa pakhat chuan a rilru a hneh em a vangin District Buhzem ah Rs. 1000/- a chhunglut ve nghal bawk a ni.

Kan thu dawnna in a sawi danin, Dt.18.4.2008 khan Seventh day Adventist Church Mizoram Hqtrs. chuan Mamit DC Rawn hmu in; District Buhzem ah Buhfai 50 qtls. rawn chhun ve an tum bawk nia hriat a ni bawk.

Pix. mart.

MEETING HELD IN CONNECTION WITH REPRESENTATION OF EX-BNLF HELD IN THE OFFICE CHAMBER OF D.C., MAMIT ON 18.4.2008 AT 11:00 A.M.

He meeting hi Pu Lalengmawia, MCS, Deputy Commissioner, Mamit in Meeting a kaihruai a, Ex-BNLF Resettlement Committee ten an lehkha thehluh chungchang sawiho nghal a ni. A hnuaia thu te hi rel a ni:-
1. Village area leh eizawnna tur ram: Damdiai BNLF Re-settlement hi khawngheta identity tur a nih chuan Village Area hi siamfel a ngai. Tin, helai ramah hian N.Sabual V.C. ten awmze nei miah lovin mimal ram an lo pe vek niin a lang a, mimal ram an pekte hian an enkawl zui chuang lo. Hei hi uluk taka enfiah a, Cancel tura hmalak tura tih a ni a, eizawnna ram (Jhum land) atana hman turin Revenue Department in hma lo la nghal tura ruat a ni.
Action: ASO-II

2. Village Boundary: A chunga mi anga khawnghet siam a nih dawn chuan Village Boundary nghet siam a tul. LAD lamin bawhzui se.
Action : DLAO

3. Solar Lamp/Electrification: Damdiai leh New Eden te hi power line thlun zawm loh an la nih avangin an dilna hi a awm hle a, ZEDA in Project/Scheme siamsak se la, chu chu Home Department ah thehluh ni se.
Tin, Damparengpui (Zodin) tan Power Line awmsa atangin kan zawm emaw leh siam belh a electrified theih a ni a, P&E Department in hma lo la se.
Action : DC/ZEDA/EE, P&E

4. Damdiai khaw panna kawng: DRDA atangin sum engemawzat SGRY/BAFFACOS atangin an dawng tawh a, Home Department atangin Rs. 50,000/- an dawng tawh bawk. Tun thlengin motor a la lut thei lova, PD, DRDA hnen atangin NREGS atangin chhunzawm a nih tur thu leh Engineer te nen kawng zawng tha a, Peg System a thawh a nih tur thu ngaithlak a ni..
Tin, Damparengpui – Zodin internal road pawh hi NREGS a thawh theih turin V.C ten hma lola bawk se.
Action : PD, DRDA/BDO, W.Phaileng/VCP, Damparengpui

5. Retailer/Ration Card: Damdiai khawtlangin retailer chungchanga harsatna an neih hi tun ami thawklai term a tawp hnai dawn tawh tih sawilan a ni a, a tharah an khawchhung mi thawk thei tur an awm a nih chuan thawk se tih an rawtna hi Department in pawmpui se.
Damdiai bakah Mamit District chhungah Ration Card neilo tam tak an awm hi a sutkianna awm chhun nia lang chu ‘Intensive Revision of Ration Card’ neih a niin hriat a ni a. Hei hi D.C in C.S hova meeting neih turah pawh lo rawt tawh leh Commissioner/Secretary, FCS&CA in a ‘note’ tawh nia hriat angin Mamit District tan Special case in Sorkarin pawmsak se an ti a..
Action: DC/DCSO

6. Water Supply : Damdiai khaw tuilakna tur (gravity water supply) hi PHED in hma an la tan mek niin hriat a ni a, chakzawka bawhzui turin department hi ngen ni se.
New Eden ah hian gravity a tuilak tur hnai a awm loh thu leh tuna tuikhur an tlan lai mek hi a thattawk loh thu an sawi a. Hei hi PHED in lo enfiah se.
Tin, Damparengpui (Zodin) tuilakna hi a intake a tha tawk lo va, tui an hmuh theih loh thu an sawi. Heihi a tira an duhdan angin metre 500 vela sang zawk atanga tuilak chuan khawpum a chawm thei dawnin an sawi. Tin, Pipe chhe thlakna hi a hma ami aiin a te zawk bawk niin an sawi. PHED in lo enfel hna lo thawk se..
Action : E.E., PHE

7. BPL/AAY a khawchhung mi zawng zawng telh: Hei hi khawtin tan Sorkar approval fel tak awmsa a nih avangin 100% cover hi chu theih a ni lo tih DCSO atanga hrilhfiah a ni.

8. Development Fund: Village Council dangte ang bawk a Development Scheme hrang hranga telve an dilna hi Village Council/Committee fel tak siam phawt a hmalak chi a ni tih hrilhfiah a ni.

9. Resettlement Village te awmna Village Council: Damdiai in Mamit Hmarveng V.C. te enkawlna hnuaia awm an dilna hi awm kan titlang a, chutiang bawkin Tumpanglui hi Tuidam V.C hnuaiah awm chhunzawm se, New Eden pawh siamfel sak ni se..
Action: DLAO

10. Self Employment Scheme: Employment Generation Scheme siam sak an dilna hi Damdiai/New Eden/Tuipuibari/Damparengpui te tan Agri/Vety/Horti/Forest Department ten lo en ni se.
Action: DAO/DVO/DHO/DFO/PD, Dampa Tiger Project
11. Electoral Roll: Electoral Roll ah hian dan ang taka inthun hi tih mek a ni a. Form 6 hmangin claim siam a, document nen hearing a inlan loh vangin New Eden bikah harsatna a awm. DO/BLO leh khawtlang hruaituten lo bawhzui se.
Action DO/BLO/VC

12. Primary School/Zirtirtu: New Eden leh Damdiai ah hian SSA hnuaiah Primary School Zirtirtu te hi khawdang atanga lak an ni a, an khawchhung mi qualified te ngei dah theih nise tiin an dil. Hei bakah hian Damparengpui/Damdiai/New Eden leh hmun dangah pawh Zirtirtu 2 (Pahnih) chauh an awm a, an indaih lo em em. Education lam hotuten kawng lo dap se.
Action : SDEO/DPC,SSA

13. Community Hall : Community Hall sak an mamawh hi BDO concerned in BADP atangin lo bawhzui turin khawtlang hian thlen ni se.
Action: BDO

14. Waiting Shed/Public Urinal: Bairabi road Damdiai penga Waiting Shed leh Urinal sak hi an sawi angin a tul hle. Amaherawhchu hetiang Scheme remchang a awm mai loh avangin thuneitu sang zawk ah khawtlangin thlen se.
Action: VCP/Chairman

15. Silpauline: Silpauline inchung atan an mamawh tih hi hmun hrang hrangah hmuhpui a ni a, tunah hian Sorkarah dil mek a ni a, a hlawhtlin chuan ngaihtuahsak theih a ni ang.
Action : DC

16. Tam chhawmdawlna: Tunah hian theih ang anga kalpui mek a ni a, harsatna bik an neih chuan Zonal Officer-ah thlen se, Zonal Officer in ruahmanna lo siam sak se.
Action : Zonal Officer concerned

17. Mamit District Headquarters ah hian thingtlang zawka khawtlang hruaitute leh mipuite tan Office dawra thlenna tha a awm lo hle a. BADP emaw Scheme dang atangin D.C. Rest House sak that a, khum pawh tam zawk dah theih ni se he harsatna hi a ziaawm sawt dawnin a lang a. Sorkar ah thlen ni se, hei hi DC kut ah dah a ni bawk a ni

HSSLC Top 10 ah mamit naupang lang.

HSSLC Result chhuak ta ah khan Mamit naupang Lalbiaktluanga s/o Lalramhluna (L) Mamit Hmunsam veng chu Mizoram pum ah 10 na a ni. A mah hi St. John HSS Kolasib a kal a ni.

Hetih laiin Govt. Higher Secondary School, Mamit pawh in result thatak an nei bawk a; 99% in an pass bawk a ni.

A.P.O thar in hna zawm ta.

DRDA Office Mamit ah chuan Assistant Project Officer pakhat dah belh a ni a, he hna thawktur hian pu PC Lalbiaktluanga chuan nimin dt.15.4.2008 khan a hna a zawm felta. Pu BT-a hi Mamit khawchhuak niin; Pu Sangkunga tupa a ni.

Kumin ah Khawthlang hmun thenkhat ah Maurah leh !!

Kumin hian Mamit District chhung, hmun thenkhat; Damparengpui , Tuipuibari velah chuan Mau a rah thar leh nual mai a, hei vang hian mamit District hmun thenkhat ah chuan Mautam kan la tuar dawn ni in a lang.

Pix: Mart: mamit districta 2008 a maurah thar chu !

Khawthlang Lelte Top 5 thlan a ni ta!!!

Khawthlang Lelte' Mamit a neih mek chuan a vawrtawp a thleng hnai ta a. Top 10 atangin Dt.12.4.2008 (inrinni) zan khan live in top 5 puanna neih leh a ni a, mipui tamtakin a hmun ah an en bawk a ni. A hmun a kal te pawh hian contest an neihna chhung ah chuan an lut thei chung lova; pawn ah TV lian ah an lo thlir a, thawm pawh a tha ham ham thin hle.

pix : Top 10 and Judges.

Top 5 atang hian Lelte an thlang nghal ang. Top 5 te chu :-
1. Benjamin Lalremruata, Venghlun, Mamit
2. PC Lalthansanga, W.Phaileng
3. Rebecca Zothanpari, Rulpuihlim
4. K.Vanrammawii, Ailawng
5. C.Zoramchhana, Hmunsam veng, mamit te an ni a, heng te a tangin hian Khawthlang Lelte' chu thlan a ni dawn a ni.

Mamit DC Bialfang.

Mamit, April 11: Date 10.4.2008 hian Pu, Lalengmawia, Mamit Bawrhsap chuan a bial chhunga tam tuarte a hmun ngeiah tlawhin, an harsatnate khawtlang hruaitute a sawipui a. Heng khua Hmunpui, Rawpuichhip, Lengte, Nghalchawmte a tlawh a, Saitlaw khawtlang hruaitute pawh Hmunpuiah hian kovin, titi puina a nei nghal bawk ani. Heng khuaah te hian thusawiin, Mamit Bawrhsap chuan sorkarin a hmalakna hrang hrangte a tarlang a, tam vangin tumah an thi tur ani lo tih leh intam siak loh tur tihte uar takin a sawi bawk ani. Tin, khawtlang hruaitute harsatna ti ziaawm turin Buhfai Quintal 2 leh Silpaulin a sem theuh bawk ani.
Date 10.4.2008 vek hian Pu Lalengmawia, Deputy Commissioner, Mamit chuan Rawpuichhip Branch YMA Diamond Jubilee chu khuallian angin a hmanpui a, infuihna leh tamte tana sorkar hmalakna hrang hrang a tarlang bawk ani.


TK/Vlng

Issued by Information & Public Relation Department Officer, Mamit District, Mamit

Dt.10.4.2008 khan Rawpuichhip Br.YMA chuan Diamond Jubili an lawm.

Nimin Dt.10.4.2008 khan Rawpuichhip khua chuan Br.YMA diamond Jubilli khawtlang in an lawm a. Hetah hian Chief Guest ah Mamit DC Pu Lalengmawia niin; Khualzahawm ah BDO, Reiek chu ruat a ni bawk. Tlaiah khawpumpuiin Ruai nen an lawm a ni.

MPC Mamit District Hearquarters hawng.

Nimin Dt.10.4.2008 khan Mamit District MPC Headquartes chu chawhma khan Siamliana Hall, Charkawn ah hawn a ni a. Aizawl lam atang in an rawn kal thahnem hle.

Mamit khawchhunga HSLC Result a hlawhtling te leh Mamit District MCS tling thar leh HSLC Top 10 a tling te lawmpuina neih a ni

PRESS RELEASE
No. 21/08
Mamit, April 9: Vawiin ni 9/4/2008 11:00 a.m. hian Mamit D.C. Pu Lalengmawia’n D.C. Conference Hall-ah Mamit khawchhunga 2008 HSLC Result-a hlawhtling te lengah sawmin thingpui inpuina leh inkawmhona a neihpui a. Hetah hian Matric Pass thar Nu leh Pa te, Headmistress & Staff, Mamit H/S, Headmaster & Staff, Mamit H/S-II, Education Deptt. Officer te, DPC, SSA, Principal DIET, Principal HSS, Chanchinbumite, VC te leh NGO te sawm an niin an tel kim hle a ni. D.C. hian Lawmpuina Certificate bakah Cash incentive a hlan nghal bawk a ni. Hemi rual hian Mamit District chhung HSLC Topper zinga 2nd Position hauhtu Rebecca Lalhruaitluangi D/o Lalkhanthanga, Damparengpui leh tun hnaia Mamit District chhung atanga MCS tling awm chhun Lalhmansanga S/o Zadingluaia Khiangte, Kawrtethawveng te hnenah Certificate leh Cash incentive D.C. hian a hlan tel bawk a ni.
TK/Ld

Issued by Information & Public Relation Department Officer, Mamit District, Mamit.

Dt.9.4.2008, Mamit Matric pass te lawmpuina

Press Release

Information & Publicity , DC Office Mamit: Nimin Dt.8.4.2008 zing dar 9:40 khan Pu Shantanu, Secretary, Border Management, Ministry of Home Affairs leh a hnungzuitute chu Tuipuibari a BSF Out Post ah Helicopter in an rawn tum a. Bru(Tuikuk) te inbenbel dan tur leh an harsatna hrang hrangte sawipui tura lokal an ni.
He inkhawmah hian Mizoram sorkar aiawhin Mamit DC,Pu Lalengmawia leh a hnuaia Officer-te bakah Home Department atangin Pu R.Romawia Deputy Secretary Home, AIG-I, SP(CID), leh Addl.SP, Mamit ten secretary hi an lo tawiawm a. He an inkawmna ah hian inpawh takin darkar khat dawn hun an hmang ho a ni.

Hospital thuamtha mek.

Mamit District Hospital a hman turin kawchhung enna khawl 'Ultrasound' chu rawn thlen a ni ta a, hemi rual hian nau neihna bungrua engemaw zat rawn dah a ni bawk. Ultrasound dahna tur building hi sak thuai tum a ni.

Savawm nen insual !

Pu Lalsawmliana, mamit vengthar chu dt.4.4.2008(Zirtawpni) khan Savawm nen an insual. Pu sawma hi a chawhmeh zawng haw Chilui kawngah a kal a, Savawm sum ruk zet tur chuan kawngchhak atangin a lo bei thut a, a ni hian chem a lo ken chhuah sa avangin theih tawpin a lo sat ve a, hun engemaw chen an inbeih hnuah an inthathen ta a ni. Vanneihthlak takin Pu Sawma hian hliam na lutuk a tuar lo a ni.

Ramri thar hman dan tur sawi ho dawn.

Vawiin Dt.8.4.2008 hian Election Commission of India in Constituency/Delimitation Boundary thar hman tawh tur thu a rawn hriattir angin Polling Station leh Constituency area thlak danglam vek a ngai dawn ta a. Hemi chungchangah hian Mamit District pawh inpuahchahna hnuaiah a kal chho mek a, vawiin dt.8.4.2008 chhun dar 12:00 noon hian SDO(S)/EO Office Chamber ah Mamit polling station area tihfel dan tur chungchang sawihona neih a ni dawn a, party hrang hrang aiawh leh sorkar aiawh an inhmukhawm dawn a ni.

Rengdil ah In kangral vek.

Dt.6.4.2008 zan khan Rengdil Hmuntha tlanga Pu R.Lalduhawma In chu bungrua engmah chuh hman lohvin a kang ral vek a, In kang lai hian Pu Duhawma te nupa chu Bial inkhawmpui hmangin an kal a, an fapa pawh a inkhawm a vangin Inah hian tumah an awm lova, bungrua engmah an chuh hman lo a ni. In kang chhan hi Electrict kalsual vang ni a rin a ni.

MZI Mamit buatsaih, 'Khawthlang Lelte' tluang taka neih chhunzawm zel a ni.

Mamit MZI Buatsaih, 'Khawthlang Lelte' chu tunlai hian DIET Conference Hall ah neih chhunzawm zel a niin; tunah hian Top 10 chin an thlifim tawh a ni. Top 10 chin phei hi chu an zai thiam tawh takzet a, Mamit mipui pawh in an hlut tawh hle in; a hmunah mipui tamtak in Big Screen ah an thlir thin a ni.

Top 10 te hian tunkar ningani leh zirtawpni zan; (Dt.10 & 11.4.2008) khian intihsiakna nei leh in, an zing atangin top 5 thlanchhuah leh an ni ang.

Top 5 te hian Siamliana Nite hmangin intihsiakna an nei anga, Chhimveng Hall ah an ti tawh dawn a ni. Top 10m a tling zawng zawng te hian Rs.2000/- an dawng theuh dawn a ni.

He Khawthlang Lelte a pakhatna hian Scooty emaw Keyboard an duh zawk zawk leh Rs. 10000/- an dawng ang.

Top 10 a tling te chu :-

1. K.Vanlalhruaii, Zion veng, mamit

2. Benjamin Lalremruata, Venghlun,mamit

3. K.Lalduhkimi, Mizo veng, mamit

4. John Lalhriattluanga, Venghlun, mamit

5. C.Zoramchhana, Hmunsam veng, mamit

6. Hmingthanpuia Ralte, Tuidam

7. K.Vanrammawii, Ailawng

8. PC Lalthansanga, W.Phaileng

9. ZD.Lalchhanhimi, W.Lungdar

10. Rebecca Zothanpari, Rulpuihlim te an ni.

Job Card turin thla lak a ni.

Vawiin Dt.3.4.2008 atang khan Mamit DC Hall ah Ni 100 inhlawhna (NREGS) a tan Job Card turin thlalak tan a ni a, hetah hian kal an thahnem hle a ni.

GR 2nd Instalment Pekchhuah dan bithliah fel

Mamit April 2: Dt.2.4.2008 hian Bawrhsap, Pu Lalengmawia hovin a Office Chamber ah Mamit District in tam tuarte tanpui nana GR chu a thawh hnihna sem chhuah dan a hnuaia mi ang hian an bithliah fel a ni.

1. SDO(C) Kawrthah - 4,00,000/-
2. SDO(C) W.Phaileng - 6,00,000/-
3. BDO, Zawlnuam - 3,00,000/-
4. BDO, W.Phaileng - 3,00,000/-
5. BDO, Reiek - 2,00,000/-
6. SDO(S) - 3,00,000/-
Total= 21,00,000/-


(Issue by Information & Public Relation Department Officer,Mamit District Mamit)

Mamit District Tam Committee neih ni.

PRESS RELEASE

Mamit,April 2: Dt.2.4.2008(thawhlehni) 11:00 a.m hian District Level Tam Committee chu an Chairman Pu Lalengmawia, DC kaihhruai in a Office Chamber ah neih a ni a. He Committee hian Mamit District chhunga Tam Committee - a Area Officer leh Zonal Officer ten an bial theuha an hnathawh dan leh tuna an dinhmun diktak te report kimchang takin an pe a. IWDP beneficiaries dinhmun te Charity Fund hmandan te leh GR District chhunga sem dan te chiciar takin report ngaihthlak a ni bawk.

Tin, hei bakah hian Border Fencing chungchanga Compensation pekdan te leh dawngtute list leh an dawn zat te pawh chipchiar taka tarlangin; heng hna hrang hrang an thawhna kawnga harsatna awmte sutkian dan tur te sawiho a rel a ni bawk. Heng bakah Department hrang hrang in mipui tana hna an neihte mi harsa ten inhlawhna an neih theih nan a tam thei ang berin inhlawhna siamsak nise tih an rel bawk.

Tin, he committee hian tun dinhmuna GR kan la neih Rs.44,93,000/- hmanzui dan turte sawihoin hei hi chu committee puia rel lovin D.C. leh Area Officer ten uluk takin a hman dantur lo duang mai se tih rel a ni a. NREGS 1st April,2008 a kan hman tur chungchanga hriattur pawimawhte inhrilhfiahna Pu Rotluanga,Project Director, DRDA, Mamit in neiin; hei hi sum awm veleh hna tan mai thei tura an inpeih tawh thu a tarlang bawk.

Tin, District Bawrhsap chuan mautam Tam avangin District huamchhungah mi tumah an thi tur a nilo tih hi kan rilruah vawng rengin kan mawhphurhna theuh, Village Level ni emaw; Zonal emaw, Area-ah pawh kan hlenchhuah a tul a, kan lo thawh tawhnaah lungawi thlak thawkhat mahse, nasa lehzuala tan la turin kalkhawmte a chah bawk a ni.

He meeting ah hian District chhunga Area Officer, BDO/SDO te Zonal Officer te District chhunga Head of Offices te, Party hruaitu leh NGO te leh chanchinbumi te an telkim hle a ni.

(Issue by Information & Public Relation Department Officer, Mamit District, Mamit)

Media tihchak dan tur ngaihtuah.

Nimin Dt.1.4.2008 chawhnu khan Mamit DC Pu Lalengmawia hovin a Office Chamber ah sorkar hmalakna leh mipuite hriat tur puanzar kawnga chak zawk a hmalak dan tur ngaihtuahin AIR leh Doordarshan Correspondent, IPRO leh DC Office a Officer te'n meeting an nei a, DC Office a Information & Publicity Incharge atan Dr. Lalngura Tlau, SDy.M chu ruat a ni a, a ni hian staff tur in; Lalruata Hlondo, CIC Operator, Linda-i, Computer operator leh Lalnghahmawia, Cameraman te ruat an ni bawk.

Mamit IPRO Office ah LDC leh Computer Operator dahbelh turin thuneitute ngen nise, Aizawla Mamit district news Correspondent atan Pu VL Huapzauva, Republic venghlun chu ruat a ni bawk a. Press Release pawh tam zawka chhuah thin nise an ti bawk.

Mamit district ah sum lut tam.

Development of Northeast Region (DoNER) atangin Rural Development chuan Mamit District chhunga khaw hrang hrang ah Community Hall sakna turin pawisa a pechhuak dawn a. Nimin khan Mamit DRDA Office chuan YMA hruaitute kikhawmin he thu hi a hrilhfiah a ni. Hall sakna atana sum hmu turte chu heng te hi an ni, Mamit Hmarveng Rs.29.16 lakh, Mamit Lungsir - 9.5 lakhs, Kawrthah - 23.6 lakhs, leh Reiek - 29.16 lakhs te an ni.

Source : Mamit Times)